Arsenal yalia, Liverpool kicheko

Arsenal yalia, Liverpool kicheko

Ujumbe kutoka kwa mashabiki haukuwa nyuma

MSIMU mpya wa Ligi Kuu ya England umeanza vibaya kwa timu ya Arsenal ambayo ikicheza nyumbani ilikubali kichapo cha mabao 3-1 kutoka kwa Aston Villa.

Arsenal wakicheza mbele ya mashabiki 60,003, walionekana kushindwa kuhimili kishindo cha wageni Aston Villa, licha ya kutangulia kupata bao dakika ya sita likifungwa na Olivier Giroud.

Hata hivyo Aston Villa walicharuka na kusawazisha bao hilo dakika ya 22, likifungwa na Christian Benteke, hivyo kwenda mapumziko matokeo yakiwa sare ya bao 1-1.

Kipindi cha pili kiliendelea kuwa cha mashambulizi kwa pande zote mbili na dakika ya 61, Benteke aliifungia bao la pili Aston Villa kabla ya Antonio Luna kufunga la tatu, hivyo kuondoka na ushindi wa mabao 3-1.

Katika mechi nyingine ya mapema, Liverpool wakicheza kwenye Uwanja wao wa Anfield, waliianza ligi kwa furaha baada ya kuvuna ushindi wa bao 1-0, likifungwa na Daniel Sturridge.

Nayo West Ham  United ilishinda 2-0 dhidi ya Cardiff na Sunderland ikichapwa bao 1-0 na Fulham huku Norwich City ikitoka sare ya 2-2 na Everton.

Aidha, timu ya West Bromwich Albion ikicheza nyumbani, ilianza msimu kwa kipigo cha bao 1-0m kutoka kwa Southampton.

 Ligi hiyo inayoshindanisha timu 20, itaendelea tena kesho kwa miamba ya ligi hiyo kuendelea kutupa karata za kwanza kwa wageni Crystal Palace kuwaalika Tottenham  huku Chelsea wakiwa wenyeji wa Hull City.

Manchesster City wao watasubiri hadi kesho kuwakaribisha Newcastle United.

Yanga yanyanyua Ngao kwa mbwembwe

Yanga yanyanyua Ngao kwa mbwembwe

BAO la dakika ya tatu likifungwa na kiungo Salum Telela, jana lilitosha kuipa Yanga ubingwa wa Ngao ya Jamii katika mechi kali iliyochezwa Uwanja wa Taifa jijini Dar es Salaam, ikiwa ni kuukaribisha rasmi msimu mpya wa Ligi Kuu ya Bara itakayoanza Agosti 24.

Kuingia kwa bao hilo kuliongeza kasi ya mchezo kwa Azam kucheza kwa nguvu wakitaka kusawazisha huku Yanga nao wakitaka kuongeza la pili, hivyo kuwapo kwa kosa kosa kwa kila upande.

Azam ambao jana walishuka dimbani kwa mara ya kwanza tangu warejee nchini kutoka Afrika Kusini kupiga kambi ya wiki mbili tangu Agosti 3 hadi 13, wakicheza mechi nne za kirafiki, walionesha kiwango kizuri huku wakishangiliwa na mashabiki wa Simba.

Hata hivyo, Yanga watapaswa kujilaumu kushindwa kuondoka na ushindi mnono kutokana na wachezaji wake kushindwa kuzitumia nafasi walizopata, akiwamo Jeryson Tegete, Didier Kavumbagu na Haruna Niyonzima.

Dakika ya 30, Azam FC walipata nafasi nzuri ya kuweza kufunga bao la kusawazisha, lakini kipa wa Yanga, Ally Mustapha ‘Barthez’, akafanya kazi kubwa ya kuokoa hatari hiyo.

Barthez aliumia hadi kutolewa nje akishindwa kuendelea na mchezo baada ya kugongana na John Bocco katika hekaheka langoni, hivyo nafasi yake kutwaliwa na Deogratius Munish ‘Dida’ aliyewahi kuidakia Azam FC.

Dakika ya 41, Nadir Haroub ‘Cannavaro’ alilimwa kadi ya njano na mwamuzi, Oden Mbaga, baada ya kumchezea rafu Bocco na dakika ya 45, Tegete alikosa bao kwa shuti kwenda nje sentimeta chache.

Kipindi cha pili kilianza kwa kila timu kucheza kwa nguvu huku Azam wakicheza rafu na katika dakika ya 52, David Mwantika, alilimwa kadi ya njano baada ya kumwangusha Kavumbagu.

Dakika ya 57, Yanga walipata nafasi nzuri baada ya Simon Msuva kutoa pande kwa Tegete ambaye alishindwa kufunga.

Dakika ya 62, Azam walipata nafasi ya kusawazisha bao hilo, lakini mpira wa kichwa uliopigwa na Bocco ulitolewa nje na kuwa kona ambayo ilipigwa na Hamis Mcha na kupanguliwa na kipa Dida wa Yanga.

Dakika ya 67, Kavumbagu alikosa bao baada ya shuti lake la ‘tick-tack’ kwenda nje kabla ya kukosa tena dakika mbili baadaye.

Dakika ya 70, Bocco aliumia baada ya kukumbana na Twite na kurejea dimbani baada ya matibabu, lakini akicheza kwa dakika tatu kabla ya kutolewa, safari hii akimpisha Gaudence Mwaikimba.

Dakika ya 79, kwa mara nyingine Kavumbagu alishindwa kuifungia Yanga bao baada ya shuti lake la kichwa kugonga mwamba, baada ya kupata pasi iliyotokana na mpira wa krosi ya David Luhende.

Katika kipindi hicho cha pili, Yanga walionekana kufunika zaidi, wakicheza watakavyo licha ya vijana wa Azam kupambana vilivyo kusawazisha bao na hadi filimbi ya mwisho, Yanga walitoka kifua mbele kwa bao 1-0.

Ushindi huo umeiwezesha Yanga kuukaribisha vizuri msimu mpya, kwani wametwaa Ngao ya Jamii zikisalia siku saba tu kabla ya kuanza kwa mbio za Ligi Kuu, ambapo Yanga wakiwa mabingwa watetezi, wataanzia kwa Ashanti United ya Ilala.

YANGA: Ally Mustapher ‘Barthez,’/DIDA, Juma Abdul, David Luhende, Kelvin Yondani/Mbuyu Twite, Athuman Idd ‘Chuji,’ Simon Msuva, Salum Telela, Jeryson Tegete, Didier Kavumbagu na Haruna Niyonzima.

AZAM: Aishi Manula, Erasto Nyoni, Waziri Salum, David Mwantika, Agrey Morris, Himid Mao, Kipre Tchetche, Salum Aboubakar, Kipre Balou, John Bocco/ Gaudence Mwaikimba na Hamis Mcha.

Kanu: Nigeria Itatwaa Kombe la Dunia

Kanu: Nigeria Itatwaa Kombe la Dunia

Nwanko Kanu akiwa pamoja na familia yake.

MSHAMBULIAJI wa kimataifa wa zamani wa Nigeria, Nwankwo Kanu (37), amewatabiria mafanikio makubwa mabingwa wa Afrika, Super Eagles, kwamba wanaweza kuibeba Afrika katika kipute cha fainali za Kombe la Dunia za mwakani nchini Brazil.

Nwanko aliyewahi kuchezea kwa mafanikio makubwa katika klabu mbalimbali barani Ulaya ikiwemo Arsenal, amesema kwa ubora wa kikosi cha Super Eagles cha sasa na uwezo wa benchi la ufundi chini Stephen Keshi, timu hiyo itapata mafanikio makubwa katika fainali hizo.

“Tutacheza fainali za Kombe la Dunia mwakani tukiwa na shauku ya kubeba ubingwa kwa niaba ya Afrika. Na kuhusu mechi ya mwisho dhidi ya Malawi, tu tayari na tutashinda,” alisema Kanu alipozungumza na mtandao wa Goal na kuongeza: “Tuna kikosi bora cha ushindani kinachoweza kutupa raha katika fainali za Kombe la Dunia,” alisema Kanu.

“Tunahitaji wachezaji wenye njaa ya mafanikio na wenye uchungu na nchi wenye kutambua wajibu wao katika kuipigania nchi.

“Ndiyo sababu ya timu hii kufanya vizuri, japo uwepo wa nyota wazoefu ni sababu nyingine, wote hupambana kupigania ushindi.

“Nyuma ya wachezaji, tuna benchi lenye makocha bora walio tayari kuipa timu mafanikio,” alisema nyota huyo aliyekuwepo kwenye kikosi cha vijana wa chini ya miaka 23 kilichobeba medali ya dhahabu katika fainali za Olimpiki mwaka 1996.

Hata hivyo, ili Nigeria iweze kuvuka hatua ya makundi na kutinga hatua ya 10 bora itakayotoa timu tano za kwenda Brazil, inakabiliwa na mechi ya mwisho katika kundi F, dhidi ya Malawi itakayochezwa Septemba 6.

Katika mechi hiyo, Nigeria yenye pointi tisa, inahitaji walau sare tu kumaliza kinara wa kundi kutokana na Malawi chini ya Kocha wake Tom Saintfiet kuhitaji ushindi kwani itashuka dimbani

siku hiyo ikiwa na pointi saba.

Suarez, Liverpool wamaliza tofauti

Suarez, Liverpool wamaliza tofauti

HATIMAYE mshambuliaji wa kimataifa wa Uruguay, Luis Suarez, jana alifanya mazoezi na wenzake wa kikosi cha kwanza Cha Liverpool baada ya kufanya majadiliano na kocha wake, Brendan Rodgers.

Suarez, 26, aliyekuwa akitaka kuhama Anfield bila mafanikiuo, alirejea katika kikosi cha Liverpool tangu Alhamisi baada ya kuichezea Uruguay katika mechi ya kirafiki ya kimataifa dhidi ya Japan na kushindwa mabao 4-2, mjini Miyagi.

Awali, nyota huyo aliyekuwa akifanya mazoezi kivyake baada ya kutaka kulazimisha kuondoka Anfield kwa njia ya kisheria hadi pale atakapoomba radhi kwa kocha wake na klabu ya Liverpool.

Licha ya Suarez kuwindwa vikali na klabu kadhaa hasa Arsenal ambayo hata mchezaji mwenyewe alisema alitaka kujiunga nayo akitaka kucheza Ligi ya Mabingwa, mpango huo umekwama na nyota huyo amekubali matokeo.

"Ninataka kuelekeza nguvu na akili zangu katika kucheza soka," alisema Suarez atakayekosa mechi sita za Ligi Kuu inayoanza leo kwa kosa la kumng’ata sikio beki wa Chelsea, Branislav Ivanovic tangu Aprili mwaka huu.

Suarez, aliyetua Liverpool tangu Januari 2011, akitokea Ajax  ya Ufaransa kwa kitita cha pauni mil 22.7, amecheza jumla ya mechi 44 na kufunga mabao 30.

Ushabiki wamponza Mrisho Ngasa

Ushabiki wamponza Mrisho Ngasa

KAMATI ya Sheria na Hadhi za Wachezaji ya Shirikisho la Soka Tanzania (TFF), imepitia usajili wa Ligi Kuu na kumuidhinisha mshambuliaji Mrisho Ngasa kuchezea timu ya Yanga, huku ikimfungia mechi sita na kumtaka kurejesha sh milioni 30 na fidia ya asilimia 50 kwa klabu ya Simba.

Kwa mujibu wa Ofisa Habari wa TFF, Boniface Wambura, kamati hiyo chini ya Mwenyekiti wake Alex Mgongolwa, imebaini kuwa ni kweli Ngasa alisaini mkataba mwingine Simba katika kipindi ambacho alikuwa na mkataba na Azam, ambako alipewa kiasi hicho cha fedha.

Kutokana na kubainika kwa hayo, Ngasa anatakiwa kurejesha fedha alizopokea, sh milioni 30, pamoja na fidia ya asilimia 50 (ambayo ni sh milioni 15), hivyo kulipa jumla ya sh milioni 45, kwa Wekundu wa Msimbazi, ambao walimtoa Azam FC kwa mkopo.

Kamati ya Mgongolwa, pia imemfungia Ngasa kucheza mechi sita za mashindano zilizo chini ya TFF, kuanzia Ngao ya Jamii kesho, baina ya Yanga na Azam FC, na anatakiwa awe amelipa fedha hizo ndani ya kipindi cha kukosa mechi hizo.

Endapo Ngasa atashindwa kulipa fedha hizo kwa wakati huo, hatoruhusiwa kucheza hadi atakapokamilisha hilo.

Aidha, kamati imepitia pingamizi zote zilizowasilishwa kuhusu usajili wa wachezaji, kukatiza mikataba na kuzitaka klabu husika ziwe zimetatua masuala hayo hadi Agosti 22.

Kwa upande wa wachezaji wa kigeni, kamati imeagiza wasiruhusiwe kucheza hadi watakapopata hati za uhamisho wa kimataifa (ITC), pamoja na vibali vya kufanya kazi nchini.

Kamati hiyo itakutana tena Agosti 23 ili kupata ripoti za pingamizi ilizoagiza ziwe zimefanyiwa kazi hadi Agosti 22 na kutoa uamuzi kwa pande ambazo hazikuafikiana.

Wakati huo huo, Kamati ya Uchaguzi ya TFF, kwa kuzingatia mamlaka iliyonayo katika kifungu cha 10(6), cha Kanuni za Uchaguzi, imesogeza mbele tarehe ya uchaguzi mkuu kutoka Oktoba 20 hadi 27, ukitanguliwa na mkutano mkuu siku moja kabla, huku ule wa Bodi ya Ligi Kuu ukibaki kuwa Oktoba 18.

Sababu za kusogeza mbele uchaguzi huo ni kutokana na kuwa Oktoba 20 uongozi wa TFF utakuwa na shughuli nyingi za maandalizi ya mechi ya Simba na Yanga na hivyo haitawezekana kusimamia shughuli za mkutano mkuu wa uchaguzi kwa wakati mmoja na mchezo huo.

Kutokana na mabadiliko hayo, siku ya mwisho ya kampeni itakuwa Oktoba 25, badala ya Oktoba 17 ya awali na ukiondoa mabadiliko hayo, ratiba ya mchakato wa uchaguzi itabaki kama ilivyotangazwa na kamati hiyo Agosti 24 mwaka huu.

Wambura alibainisha kuwa kamati inaamini wahusika wote watapokea vema mabadiliko yaliyotokana na Sekretarieti ya TFF kumwandikia Mwenyekiti wa Kamati ya Uchaguzi, kumuomba kupishanisha mechi na uchaguzi, kwa vile yeye na kamati yake ndio wenye mamlaka.

Yanga TV kuonekana ndani ya Azam Media

Yanga TV kuonekana ndani ya Azam Media

HATIMAYE mabingwa wa soka Tanzania Bara, Yanga, wameamua kufuata nyayo za watani wao Simba, baada ya kukubali kuingia mkataba na Azam Media ili kurusha kipindi chao kitakachojulikana kama Yanga TV.

Awali, Yanga walikataa udhamini wa Azam TV kurusha mechi zao za Ligi Kuu Bara, kwa madai mbalimbali, ikiwamo kupinga dai la sh milioni 100, kabla ya juzi kulipeleka suala hilo Wizara ya Habari, Vijana, Utamaduni na Michezo, ambako lilijadiliwa na pande zinazovutana kufikia mwafaka.

Klabu nyingine za Ligi Kuu ikiwamo Simba, ziliafiki udhamini, ambapo mbali ya sh milioni 100 hizo za udhamini wa Ligi Kuu, Wekundu hao wa Msimbazi, awali waliingia mkataba wa sh milioni 300 na Azam Media kurusha vipindi vyao vikijulikana kama Simba TV.

Habari zilizoifikia zinasema kuwa Yanga na Azam Media, walianza vikao juzi na kuzungumza mambo mengi likiwamo la kipindi chao cha TV kurushwa Azam TV, ili waweze kuwa tofauti na timu nyingine, kutokana na ukubwa wa jina na idadi kubwa ya mashabiki.

“Baada ya kukutana na Naibu Waziri, Yanga na Azam Media walikaa na kuanza mazungumzo na wamefikia pazuri, ambapo na wao watapewa udhamini kama waliopewa Simba wa sh milioni 300 kuonesha kipindi chao katika Azam TV,” alisema mtoa habari huyo ambaye hakutaka kuandikwa jina lake, kwa kuwa bado pande hizo zinaendelea na mazungumzo, japokuwa wamefikia pazuri.

Aidha, chanzo chetu cha habari kiliwasaka viongozi wa pande hizo, Azam TV, Said Mohamed na Yanga, Clement Sanga, ambao walikuwapo juzi katika kikao na wizara.

Mohamed alisema bado wanaendelea kuzungumza na mara baada ya kufikia mwafaka wataweka wazi suala hilo kuanzia leo huku Sanga simu yake ya kiganjani ikiwa haipatikani.

Surez aamua kubaki Liverpool

Surez aamua kubaki Liverpool
HATIMAYE nyota wa kimataifa wa Uruguay, Luis Suarez ametamka bayana kuwa ameamua kubaki Liverpool kutokana na mpango wake kutaka kuondoka kugubikwa na mizengwe ikiwemo kubaniwa na klabu yake ya Liverpool inayotaka abaki.

Licha ya shauku ya nyota huyo kutaka kuondoka kutokana na kuandamwa na vyombo vya habari vya England kiasi cha kutamani kuondoka Anfield na kwenda Arsenal, amesema sasa atabaki hapo kwani Liverpool imegoma kumwachia.

Mbali ya kuandamwa na vyombo vya habari, pia Suarez alikuwa na hamu ya kutua Arsenal akitamani kucheza Ligi ya Mabingwa huku wakali hao wa Emirates wakiwa tayari kutoa pauni mil 42, Liverpoo wakatupa ofa hiyo.

Nyota huyo aliyetua Liverpool misimu kadhaa kutoka Ajax, amesema anabaki Anfield kutokana na kupendwa na mashabiki wa timu hiyo

Akizungumza na gazeti la El Observador la nchini kwao Uruguay, Suarez alisema: "Kwa sasa nimeamua kubaki kutokana na upendo wa mashabiki," alisema.

Juzi, mwandishi wa Kituo cha Televisheni cha GolTV, Martin Charquero, alikuwa wa kwanza kutangza kuwa nyota huyo alikuwa amemweleza kuwa atabaki Liverpool licha ya kutakiwa na Arsenal.

Habari hiyo ya mwandishi wa kituo hicho ilitanguliwa na ile ya nahodha wa Liverpool, Steven Gerrard akisema Suarez hatahama japo kuna presha kubwa ya Arsenal kutaka ahamie Emirates.

"Luis Suarez amenihakikishia kuwa hataondoka Liverpool kutokana na ushawishi mkubwa wa mashabiki wa," alisema Mwandishi huyo kupitia akaunti yake ya twitter.

Uamuzi huo wa Suarez ni habari njema kwa Liverpool iliyokuwa ikihaha kumbakisha na mbaya zaidi pale nyota huyo alipotaka suala hilo lichukue mkondo wa kisheria kuangalia uwezekano wa kutimkia Arsenal.

Hata hivyo, Kocha wa Liverpool Brendan Rodgers, akamtaka Suarez aombe radhi kwa klabu na wachezaji wenzake kwa kauli hiyo, vinginevyo ataendelea kufanya mazoezi kivyake katika kipindi

hiki kuelekea msimu umpya wa Ligi Kuu.

Suarez abayetumikia adhabu ya mechi sita za Ligi Kuu kwa kosa la kumng’ata Branislav Ivanovic wa Chelsea mwishoni mwa msimu uliopita, alimaliza msimu huo akifunga mabao 23, hivyo kuwa nafasi ya pili kwa ufungaji.